தொண்டின் வடிவம் எங்கள் சாமி

Description

சாமியோ அன்றுமுதல் இன்றுவரை வெளியில் கிளம்பும் போதே பை நிறையப் பணத்துடனேயே கிளம்புவார். சம்பூர்ணமும் ஏன்? எதற்கு? எனக் கேட்டறியார். வீடு திரும்பும்பொழுது கையிலுள்ள சில்லறைக்குப் பத்திரிகைகளாவது வாங்கிக் கொள்வார். பை மட்டும் திரும்பி வரும்.

அரசியலில் இருப்போர் அதிலும் ஆளும் கட்சியினராயின் பொருள் சேர்க்கும் வாய்ப்புக்கள் அமைவது நம் நாட்டில் புதியதன்று. ஆனால், பலர் தாம் பெற்ற பதவியைப் பொருள் தேடும் வாயிலாகவே வணிகமாகவே ஆக்கிக் கொள்வதுதான் அருவருப்பை அளிக்கின்றது. சாமிக்கும் மற்றவர்களைப் போலவே அப்படிப்பட்ட வாய்ப்புகள் கிட்டின. இதிலே மூடி மறைப்பதற்கு எதுவுமில்லை.

அங்ஙணம் வந்த வருவாயை என்ன செய்தார்? எப்படியெல்லாம் செலவழித்தார்? வந்த வருவாயில் கணிசமான தொகையை அப்போதைக்குப்போது தனக்குத் துணையாக நிற்போருக்கும். நண்பர்களுக்கும். உதவி நாடி வருவோருக்கும் இல்லையென்னாது வழங்கி வந்தார். அப்படி உதவுவதிலும் தனி வழியையே கடைப்பிடித்து வந்தார். தன்னிடம் உதவி நாடி வருவோராயினும் அவர்களுக்கு முழுவதுமாக உதவுவார். ஒரு பகுதியைத் தந்து மற்ற பகுதிக்கு நீயே வழி பார்த்துக்கொள் என்று சொல்லி ஒதுங்கமாட்டார். அப்போதைக்குத் தன்னால் முழுவதுமாக உதவமுடியாது என்பது தெரிந்தால் மீதமுள்ள தொகையைப் பெற அவரே வழியும் காட்டுவார். உதவி பெற்றோர் மனநிறைவு பெறுவர்.